Natusha Croes
E horizonte paden, 2022
CURATORIAL TEXT SHORT DESCRIPTION
Natusha Croes ta presenta un obra cu na e mesun momento ta e inicio di un serie di podcast titula INSCAPE. Den e prome episodio e ta discuti hunto cu Dimitry Halley (psicologo) y Sophie Berube (mediador) e concepto “sombra” den e teoria di Carl Jung, pa kende e sombra ta un di e ehemplonan principal di e inconsciente colectivo. Jung a uza e termino specifico na dos diferente manera: di un banda e totalidad di e inconsciente cu banda di e dimension personal duna door di Freud, pa Jung tin un dimension colectivo; di un otro banda e sombra ta indica e aspecto inconsciente di e personalidad, cu ta caracterisa door di e rasgonan y e actitudnan cu e ego consciente no ta reconoce como esun di su mes [1].
[1] Jung, Carl Gustav (1999-2016). Obras completas. Madrid: Editorial Trotta.
medium: Podcast
DIMENSIONS: 3:15
Natusha Croes ta un artista interdisciplinario. Desde teenager ela sigui workshops na Ateliers ’89 Aruba cu a jude crea un portofolio extenso den e ramo di arte plastico y arte visual. Na 2010 ela cuminsa su estudio na Gerrit Rietveld Academie unda cu ela specialisa den e departamento Audio-Visual. Akinan ela gradua cu un short film y un presentacion individual na 2015. Ela gradua cu un Master den Perfromance making na Goldsmiths University na Londen, Inglatera. Despues di esaki ela bai bek Aruba pa por continua desaroya e experiencia CARICIA. Ela contribui na e mundo artistico y a traha como enlace artistico pa e ministerio di Cultura. Ela traha hunto cu artistanan y colectivanan pa realisa diferente obra teatral y exposicion riba e isla. Natusha a participa den diferente exposicion internacional incluyendo Relational Undercurrents: Contemporary Art of the Caribbean Archipelago na e museo di arte Latino-Americano MOLAA na 2017. Tambe ela participa na Caribisch Liasion na CBK Zuidoost na 2016 cu kier a expone trabao di artistanan nobo Hulandes Caribense.
Su trabao ta bin for di e amor profundo pa reflexion, generando espacionan safe y declaracionan cu ta revela e complexidad y amplitud di e realidad interno. E ta fascina pa naturalesa humano y e mentalidad colectivo di Caribe. E ta wordo guia door di su intuitivanan y sensibilidadnan corporal den un estado di asombro y door di su curiosidad pa e mundo rond di dje. E ta contempla tur loke ta relata na nos sentimentonan, nos bienestar emocional y con nos por trece combersacionan cu ta guia nos den un estado di honestidad como ser humano. Su afan ta multidisciplinario, e ta activo den diferente esfuerzonan y sondeonan di e identidad , lenganan y culturanan Caribense via e lens di performance investigativo, practicanan di cine y musica. Den un forma ceremonial y ritual e ta crea espacio pa creacionan ritmico cu ta consisti di elementonan cu e ta busca for di e ambiente natural den su alrededor.
Natusha ta biba y traha na Aruba.
